„Maškare me vesele i
sva djeca na maskenbal žele!
Tu likova ima raznih, tu leptira ima važnih,
suncokreta, bijelih rada,
a Sunce ju tu da nad njima vlada.
Za maskenbal se svi pripremamo,
spremamo i šminkamo,
razne kostime na sebe oblačimo,
maske stavljamo i u svemu uživamo.
Nije to nešto što se mora,
nama je ovo stvarno prava fora!
I zato mašti na volju
za masku najbolju!“
Ovim sloganom vaspitačica JPU „Eko bajka“ Vanja Sokić pozdravila je mališane i roditelje koji su se danas okupili na Trgu 13. jul, maskirani i razdragani u bojama proljeća. Ona je napomenula da je to prva manifestacija u okviru tranzicionog plana saradnje vrtića i osnovnih škola. Učestvovali su mališani iz osnovnih škola „Boško Buha“, „Salko Aljković“, „Ristan Pavlović“, a tu su bila i djeca iz vrtića i prvaci sa Žabljaka, predškolci i prvaci iz Komina i iz Odžaka, kao i djeca iz JPU „Eko bajka“ sa svojim vaspitačicama i roditeljima.
– Nikada do sada naš grad nije bio ovako lijep, raspjevan i razdragan. Uživajte u proljećnom maskenbalu sa osmijehom na licu i da kroz igru, učenje i druženje nastave da spoznaju svijet oko sebe. Cilj nam je bio da se družimo i zabavimo, nadamo se da ste i vi uživali. Zahvaljujemo roditeljima na saradnji i kreativnosti – poručila je Vanja Sokić, koja je najavila koreografije „Bumbarov let“ i „Proljećni valcer“.
Mališani su nakon muzičkog dijela druženje nastavili igrajući se i crtajući šarenim kredama motive proljeća.